ONLF: Jawaab Hadal ka Soo Yeedhay Ethiopia

 

Jijiga, August 30, 2018 – Jabhada wadaniga xoraynta Ogadeeniya (JWXO), ayaa maanta jawaab gaaban ka bixisay hadal shalay ka soo yeedhay dawlada Itoobiya. Hadlkaas oo ah in ay dawlada Abiy Axmed furtay xafiis qaabilsan hawlaha Jabhadihii mucaaradka ahaa ee dhawaan la heshiiyey dawlada.

Xafiiskan oo uu madax ka yahay Mr. Tesfaye Yegezu ayaa la sheegay in uu hub ka dhigid ku samayn doono ururada hubaysan una fidin doono hawlaha ay u baahan yihiin sida shaqaalaysiinta iyo ka qayb qaadashada siyaasada haday diyaar u yihiin.

Jabhada ONLF, ayaa ku sheegtay jawaab kooban oo ay ku soo qortay barta Tweet in ayna ONLF iyo Itoobiya uuna dhex marin wax wadhadal ah keenay heshiis la kala saxiixday.

ONLF, dhawaan ayey ku dhawaaqaday xabad joojin iskeed ah ka dib kolkii ay qiimaysay xaalada cusub ee Itoobiya iyo deegaanka Soomaalida labadaba.

Jabhadu waxay hore u sheegtay in ay soo dhawaynayso isbadalka siyaasadeed ee Itoobiya ka dhacay, kaas oo abuuri kara xal waara oo ka dhaca guud ahaan Itoobiya gaar ahaana gabalka Somalida Ogadeeniya.

Jabhaa ONLF, ayaa dagaal kula jirta dalka Itoobiya in ka badan 40 sano, kaas oo ay ku doonayso madaxbanaani uu helo deegaanka Soomaalida Ogadeeniya.